16 avril 2014 par Du beos d'chuque

Bé cha i-est,cha rapproche . Bé ouais tins les cloques elles veont béteot s'in aller et du diminche de Pâques et bé elles veont orvénir.

Cha s'ra fiête pou tous les ceusses qu'i-eont acore des p'tits rot'leots qui s'reont fin contints d'queurir dins les gardins pou vir c'que Marie-Ponteoise elle ara là pondu.

Pou les grands bé après cha i-ara l'apéro et quand i s'mettreont à tape bé i-ara l'agneau Pascal bin fourré avec d'l'al (infin pou les ceusses qu'i-aim'tent cha) et des beonnes herpes du gardin. Après ceulle belle pièche de viante et bin i-ara cor l'même pou l'dessert in feorme d'agneau mais cha s'ra de l'glache vanile . Pinsez bin qu'après tout cha les estoumacs i s'reont bin rimplis et qui feaudra faire d'l'exercice pou suer tout cha.

Et bé l'solutieon elle est tout trouvée pasque du lundi au Meont Saint Aubert bé te pourras user tout c'que t'as ingurgité de l'velle. Et n'feaut pos treop s'in faire pasque ch'est grateos.Te prinds tout l'famile avec et t'ovlà parti pou l'distance qui l'ira avec t'indice de performance.Au puque que t'as mingé et au puque qui t'feaudra marcher ;infin si te sais acore ,pasque ch'n'est pos pasque t'as rimpli t'vinte que t'es pus feort.

Neon ,infin vous comperdez ,c'qui queompte c'est vous soyez là pou vous faire plaisi et que l'distance que vous f'rez cha n'a pos treop d'importance vu qu'les gins s'reont là pou s'amuser.Et si vous n'avez pos treop abusé du diminche et bé j'vous autorise à in beoire eine in heaut du Meont à l'santé des tous ces gins qu'i-areont ouvré pou que ceulle fiête qui n'est pos d'aujord'hui elle soiche acore là pou bin des ans.

A ouais si vous m'veyez là in heaut pourrez toudis m'in payer eine !

Du beos d'chuque