9 avril 2014 par Catoupi

Bé mes gins, ch'éteot fiête el' wékenne passé à Tournai, savez ! Ein carnaval au solel, ch'est pos tous les ans !

In puque de cha, i feaut dire que tout i s'a bin passé. A qu'mincher par el' nuit des intriques. Ch'est cha qui lanche el' carnaval, el' début des festivités. Et là queu spectaque ! Cha n'a foque duré eine démi-heure, mais j'aime autant cha qu'ein spectaque d' deux heures dusqu'on s'indort, comme i-a d'jà alfeos eu.

I-aveot Xavier Sourdeau avé l' reine du carnaval, qui z'eont jeué eine pétite scène, pour anneoncher l' naissance du roi. Comme el' reine elle attind famile, ch'éteot assez logique. Après on a vu ein bonheomme, habillé seul'mint avec ein lanche (i-orprésinteot l' bébé, hasard) qui-a escaladé l' Bieffreo à mains nues ! Sifet, je n' raqueonte pos des bleusses ! Et l' Bieffreo i-éteot éclairé avé des belles couleurs, mais qu' ch'éteot bieau ! Quand ç' que monheomme i-a arrivé à l'horloche du Bieffreo, i-a l' Cabaret Walleon et les Filles Celles Picardes qui z'eont canté "Les Tournaisiens seont là". Et tout cha s'a fini avec ein bieau feu d'artifice. Ch'éteot ein momint magique !

Du saim'di, bin seûr ein bieau départ avé l' deîner des confréries, l'ormisse des clés des bourguémettes (bin seûr, i z'éteottent là tous les deux), l'anniversaire des Titis et des Berlous, puis les hommaches à l' Naïate et au Pichou, dusqu'i-aveot l' vingt-cheonquième pêque aux canards pou les infants.

L' lancher des pichous offerts pa les boulangers, ch'est ein fin bieau momint avec ! J'ai ein comarate qui-a eu l' sanche d'aller in héaut du Bieffreo pou vir cha, i m'a dit qu'i-aveot eu des larmes à ses is, tell'mint que ch'teot bieau !

Après cha bin seûr, el' brûlache du Roi, les chintes à l'Esqueaut avec ein flambeau et l' soirée dansante. Tout cha avé des gins fell'mint bin déguisés, queulle imaginatieon ! I-aveot même ein panda et ein mossieu Di Rupo, qu'on areot dit l' vrai. Et i d'aveot aussi ein faux.

Du lind'main, pou les confréries courageusses, i-aveot cor ein diminche insoleillé et eine soirée à la Halle aux draps. Valeot mieux avoir congé du lundi, à m' meote !

Infin, mi, j' dis tout cha, ch'est ç' qu'on m'a raqueonté, savez; pasque j' sus puteôt du ginre calme à rester à m' maseon.

Et si vous n' croyez pos ceulle-là, j' vous in raqueont'rai eine éaute... l' prochain queop.

Catoupi