23 avril 2014 par L'infant d' Tournai

Bonjour, savez, mes gins.

J'espère que vous allez bin. Avé l' solel et l' printemps qui-arrife tout douch'mint, alors qu'on n'a pos eu d'hiver, cha deonne des invies d' voyaches...

Mais quand ç' qu'on ouèfe, i n' reste que l' wékène...

Alors, à l' fin de l' sémaine passée, j' proposse à m'n amisse d' partir ein wékène à la mer. Mais attintieon hein, pos à l' mer du Nord, dùsqu'i n'a qu' des flaminds. Ah neon, nous-z'éautes on va à l' Côte d'Opale, ch't'aussi bieau et ch'est moins tchier qu'à l' Côte Belche.

Donc, verdi au soir, j' m'in vas l' querre à s' maseon et nous ovlà partis pour ein wékène d'orpeos...au soleil...

Et ch'est vrai qu'on s'a bin orposé, on a bin mingé et comme i f'seot bieau, on s'a bin pourméné... Quoisqu'i feaut d'minder d'puque, éné ?

Mais comme tout i-a eine fin, diminche après-deîner, on s'a r'mis in route pour orvénir dins no chité.

L' route elle s'a fait sans problème, mais eine feos arrivé à s' maseon, v'là que m'n amisse elle se rind queompte que s' carette elle a disparu.

L' prumière réactieon, ch'est bin seûr d' pinser qu'on li aveot volée.

Mais après réflexieon...et in veyant les panneaux l' leong de l' Chaussée d' Renaix, on s'a dit qu'i-aveot eu eine course et que l' carette elle aveot été inl'vée.

I n' me resteot pus qu'à app'ler l' Police et d'minder quoisqu'on deveot faire...

In fait, elle se trouveot à Vezon, et pour pouvoir l' récupérer, i faudreot débourser chint vingt-cheonq eureos.

Jusque là, vous m' dis'rez qu' ch'est logique. Ahais, je n' dis pos l' contraire, mais quand ç' qu'on a parti, du verdi au soir, i n'aveot pos d' panneaux. I z'aveottent été mis du saim'di au matin. Alors, là, mi je n'sus pos tout à fait d'accord. Dins l' temps, on metteot ein papier dins les boîtes eine sémaine avant. Asteur on n' te dit pus rien, on plache les panneaux de l' velle au matin et débroul'te. Ah mais cha n' va pus cha. Cha fait qu'asteur, quand ç' que t' pars in vacances, t'as tout intérêt à orwettier l' calinderrier des courses à véleo pour vir si jamais i n'd'a pos eine qui pass'reot pa-d'vant t' maseon et qu' te pourreos ortrouver t' carette à l' fourrière !

Et on dit qu'on vit dins ein meonte dùsque l' communicatieon elle est d' pus in puque importante ? A m'n'avisse qu'elle n'est pos importante pour tertous !

Allez, là-d'ssus, à l' feos qui vient, mes gins !

L'infant d' Tournai