30 avril 2014 par Tignace

Banjour mes gins, alfeos j'attinds à mes orelles qu'i-a jamais rien à Tournai. Pourtant, quand j' ravisse dins les gazettes et les toutes boîtes, questieon « Culturel », hé bé i-a toudis eine pache tout plein pou l'z'évèn'mints du wékenne. Mi, j' cache toudis l' pus intéressant et pos trop tcher pasqu'alfeos quand t' rintes à t' maseon de t' pétite sortie, te peux faire el' poirier et qu'mincher carême. Ch'est qu'asteur, te n' vas pus bin leon avé vingt eureos.

Au calinderrier, j'ai d'jà fait eine creox à l' date du treos mai : no ville va ouvère ses musées tout l' nuit, et in puque de cha, t' pourras rintrer tout partout gratuit'mint d' cheonq heures et d'mi s'qu'à minuit et i-ara même, pou l'occasieon, des animatieons espéciales.

Vu qu' ch'est gratuit, j'ai vite eu l' bénédictieon de m' Gertrute et du queop, j' vas même in profiter pour aller in boire eine d'sus plache et qui sait, pétête caire su m' comarate Mimile.

Ah mi, porméner dins les musées, cha m' rind bénaisse. Dire qu'in vacances on va orwettier ceuss qu'i-a ailleurs sans v'nir vir les trésors qu'i-a ichi. Allez comprinte ... No ville ch'est toute eine histoire avé ses mervelles et à chaque queop qu' t'orviens, te découvères eine séquoi.

D' nos musées, mes préférés ch'est l' Musée d'Histoire Militaire, vu qu' j'ai toudis bin aimé les armes, les bieaux uniformes et jeuer à les p'tits soldats. Insuite, j'vas passer au Musée des Arts Décoratifs : quand j' pinse que dins l' temps on f'seot d' si belles porchelaines. Cha m' fait toudis raminvrer à l'orvue du Cabaret quand i z'eont fait cha su l' scène, ch'éteot d'eine bieauté, falleot vir el' tableau, pos ein qui mouf'teot, même pos pou eine puche à leu nez.

Mais ceu qu'i-ara toudis s' plache dins m' cœur, ch'est no Maseon Tournaisienne, ch'est toute l'histoire de l' vie d' nos ruaches et d' nos villaches. J' sus toudis estamperné quand j' meonte à l' salle des maquettes. Quand j' pinse à tout ç' que Vauban i-aveot fait bâtir et qu'i n' reste pus grand cosse, dire que si cha continue, même no peont des treos, te l' trouèv'ras foque qu'ichi, fait in carteon et in papier... Comme el reste, faisant partie d'eine pache du passé.

Tout d'ein queop, j'intinds berler m' Gertrute : « Ah mais final'mint, j' vas v'nir avec ! ». Milliard, j'alleos d'voir l'ormorquer toute el' soirée. Attinds vir Mal'vira ! « Dis m' chérie » que j' li répeondeos in l'intassant, « Te sais qu'asteur au Musée d'Histoire Naturelle, orconnu attractieon touristique de l' Walleonie, i z'eont des biêtes vivantes : des lézards, des serpints, des areonnes, même des mygales toutes poilues, des ... ». « Ah néon hein, si ch'est pou d'aller vir d' parelles sales biêtes, mi j' reste ichi ! »

Et l'ov'là mes gins commint qu'on tire es' plan ! Tranquille el vie, pos b'soin d' millieons.

Allez et pétête au plaisi d' vous croiser à l'ein ou l'éaute musée l' treos mai prochain au soir.

Tignace.