14 mai 2014 par Anar

Cha y-est ! L' quater-vingt-deuxième éditieon du prestigieux concours PRAYEZ est in route.

Ch'est l'promotieon Anselme Dachy, Jean Leclercq et Lucien Feron... Cha fait vingt ans qui nous eont quittés tous les treos. Comme el' temps i passe vite !

Comme à chaque feos i-ara deux divisieons pou treos sortes d'écrits (cancheon, monoloque et poème). Tout i-est bin espliqué su l' site du Cabaret Wallon, onglet concours Prayez.

Pou l' prumière divisieon, l' sujet i-est libre et si ch'est l' prumière feos qu' vous écrivez, et si ch'est eine cancheonne que vous pinsez écrire, v'la chi ein consel, n' perdez pos ein air treop rapite à canter, et n' trainez pos pou trouver l' partitieon, ch'n'est pos toudis facile à trouver.

N'hésitez pos ! Avec el' vécu ou bin l'actualité, i-a toudis bin eine idée qui vous déminche, neon ? Et puis pinsez à l'émotieon et l'fierté d'orchevoir ein prix au salon d' la Reine à l'hôtel de ville.

Et, pour ein queop, les pus jeones qui parl'tent no belle lanque tous les jours i pourreot'tent faire ein essai. Vous connissez pétête ein cancheonnier qui n' demand'reot pos mieux d' vous assister.

Pou l' deuxième divisieon, l' sujet imposé ch'est "I n'a pus foque à braire".

Ch'est vrai qu'avec tout ç' qu'on veot et tout ç' qu'on intind, on pourreot dire cha eine paire

de queops par jour. Et je n' pins' pos qu' les électieons qui z'arriftent i veont canger eine séquoi. T'nez, on devreot voter pus souvint, pasque les politiques i z'eont toudis des beonnes idées pindant l' périote électorale. Comme cha i z'areot'tent des beonnes idées pus souvint avec. Infin, i n'a pus foque à braire, mi je m' dis cha à chaque fin d' meos quand j' veos

les liards que j'ai acor. Et bin souvint, i n' m'in reste pus, mais j' warde toudis m' beonne humeur.

L' réglemint complet i-est su no site www.cabaretwallon.be , à les ferniètes de no local à l' rue saint-Martin et à l'Office du Tourisme.

Allez, à vos pleumes et à l' prochaine.

Anar.