18 juin 2014 par L' infant Pichoulit

Les pus inciens i s'raminvrent seur'mint du temps qu'on aveot acore des moucheos in coteon. On in orcheveot eine banse à s' communieon, ch'éteot pos treop tcher et cha f'seot bin plaisi.

On n'peut pos dire que ch'éteot fort hygiénique. On s'moucheot, on rimballeot l' tout et après on r'metteot tout dins s'poche si cha cait à côté des balleons ou des peos d' chuque qu'on mingeot après sans s' faire d' souci. L'AFSCA, elle a serré des boutiques pou moinse que cha.

Des moucheos, i d'aveot d' tous les talles, des grands comme ein moucheo d' poche (tins, l'espressieon elle a survécu) ou acore des ceusses que t'areos béteôt dit qu' ch'éteot des draps d' lite. I d'aveot des à fleurs, à carreaux, des fantaisies ou des tout blancs (là te pouveos bin raviser après tout quoi ç' que t'aveos mouché). I d'aveot même alfeos des parfeumés, des ceusses qui pouveotent servir à plein d'affaires, te t'essuyeos l' sueur, t'imballeos tes tartines d'dins (même qu'alfeos i z'aveotent d'jà servis), te les metteos pa-dzou t' derrière pou t'assire dusque ch'éteot mouillé, te faiseos eine pans'mint avec si te t'aveos copé et j'in passe....

Et j'oblie pos qu'i serveot à essuyer tes is les jours que t'aveos du chagrin ou qu't'aveos ri plein t' panche.

Mais après on a invinté les Kleenex (va t'in faire tout cha avec eine moucheo in papier !!). Là cha va pus vite, te t' mouques ein queop et après te l' rues (sauf si te n'as pos prévu eine réserfe et adeon, te deos t'esquinter tout l' journée à trouver eine p'tit coin acore prope pou t' soulager. Et te t'in mets plein les deogts)

Mais des kleenex i n'd'a pos qu' dins les moucheos. Ainsi, à l'z'électieons, i d'a seur'mint eine paire qui aveotent bin fait leu n'ouvrache (si, si i n'd'a quand même) mais qu' leu parti i-a décidé qu'i falleot les mette bin leon dins l' liste pou placher eine eaute qui s'in sortireot avé l' dévolutieon de s veox d' tiête (tertous i n'a pos compris mais i paraitrait qu' chest clair) Ainsi, Kleenex, à r'voir tertous... Mais, l' politique, elle n'est pos tout seu à faire ainsin. De ç' côté-là, les sportifs i n' seont pos trisses neon pus.

Ainsi dins tous les sports, tertous i sait qu' l'intraineu i paie les pots cassés quand cha n' va pus. Même si ch'est les jeueux qui s'ingambieltent, ch'est l'intraineu qui bourièle.... On s' d'a bin servi et après on l' rue. Même alfeos on n'attind pos qu' cha n' va pus, même quand cha va bin, i feaut du cang'mint, adeon on rue l' serviteur pou in printe ein eaute, moins tcher pétête ou bin pasqu'on attrape l' folie des grandeurs ou bin, eh bé, je n' sais pos ... même qu'alfeos on n' comprind pos ; Tins, ravisse au handbal ichi à Tournai par eximpe...

Mais i n'a pos qu' les gins qu'on rue, alfeos ch'est pus subtil acore.

I-a à eine vingtaine d' kilomètes d'ichi ein club de fotbal qui a eu bin de l' sanche d'in trouver ein eaute pou sauver s' matricule. Asteur que cha va bin, i-orprind ses billes et s'n'incien neom et on rue l' ceu qui aveot sauvé la mise i-a eine paire d'ainnées. Et t'intind l' présidint tout sérieux qui parle d'idintité (i areot pus l' dire pus vite).

Ch'est comme dins les ménaches, i-a trouvé eine eaute maitresse pus riche, pus sortape in société et on rue l' ceu qui-a passé les moumints douloureux pou eine eaute histoire...

Mais qu'i fait attintieon, après ch'est li qui pourreot ête rué....

Les chim'tières i seont rimplis d' gins irrimplachapes, ch'est pos pour cha qu'i feaut l'intierrer à l'avanche. L'orconnaissance et l'amitié cha n'a pos d' prix, i faudreot s'in raminvrer pus souvint.

Infin, si m' billet i n' vous plait pos, vous pouvez toudis l' ruer...mais si vous plait, n' me ruez pos avec...

Pichoulit