16 juillet 2014 par Catoupi

Stromae i-areot dit : Formida-ape, fo-ormidape ! Et on va faire la fête !

Eh bé mi j' dis qu' vous êtes formi-diapes, et on a bin fait la fiête après vos quate victoires à l' coupe du meonte. Par queonte, on n'a pos fait la fiête après l'éliminatieon pa l'Argintine. Ch'éteot injuste d'ête éliminés ainsin, par eine équipe qui n'a pos moutré grand queosse jusqu'à-là. Mi, j'ai brait. Et je n' sus pos tout seu, pasqu'on areot dû aller pus leon.

Quand ç' que vous avez r'venu du Brésil, du lundi sièt juliet, i n' falleot pos d' fiête non pus. I-a des gins qui n'eont pos campris pourquoi, mais pourtant ch'éteot clair : vous n'aviez pos l' cœur à cha. Pasque vous étiez fell'mint déçus d'avoir perdu in quart de finale. Cha veut dire qu'i-aveot bin d' l'imbitieon dins ç' groupe de jeueus, d'amisses, d' frères. Et chaquein i-areot deonné s' quémisse pour gagner ç' match. Et pour aller in d'mi, et même in finale.

Avec par au-d'zeur ed' tout cha ein intraineu d' prumier ordre, ein vrai champieon avec ein cœur greos comme cha. A ç' niveau-là, ein beon intraineu, ch'est quéqu'ein qui sait motiver ses jeueus, faire comprinte à les ceux qui n' jeut'tent pos qu'i z'areont leu tour, faire ein groupe soudé in évitant les bisbroules, et pétête aussi faire eine beonne tactique et les beons cang'mints. Adeon, z'avez tout ç' qu'i feaut pou continuer ainsin pindant au moins quatre ans, Mossieu Wilmots, cher Willie.

On peut aussi j'ter des fleurs à les jeueus, et, sans tertous les déleommer, deonner ein queop d' capieau à Daniel Van Buyten, que ch'éteot seûr'mint s' dernière coupe du meonte. Ch'est l' mélieu eximpe pou les jeones : ête sérieux, s'intrainer, n' pos s' croire eine grante vedette, pinser à s' pays. Dins deux ans, ch'est l' championnat d'Europe in France, reste acor, Big Dan ! Et même si te n' jeues pus, viens avec el' groupe pou l'z'incadrer.

Infin, grâce à vous, les Diapes, no pays tout intier i-a vibré pindant eine paire de s'maines, i-a eu du noir-gueaune-rouche tout partout, i n'aveot pus d' flaminds et d' walleons, on n'a même pus parlé d' politique, ch'est tout dire ! Ch'est dire comme la vie éteot pus belle !

Adeon, acor merci, et bin vite les prochains matchs et les prochains tournois, pour eç' queop-chi aller in finale... et gagner !

Catoupi