2 juillet 2014 par Du beos d'chuque

Et bé ouais, on est dins l'impasse. A Tournai ch' n'est pos cha qui manque, des impasses ; mais ceulle-chi ch't'eine fameusse.

L'ov'là que j' vous esplique .L' dix noué d' janvier, on f'seot ein treo, j' sais pos pourquoi d'su l' plache Paul-Emile Janson et bin i-a eine canalisatieon d'ieau qu'i-a saut'lé. Et je n' vous dis pos pou l' pavache l' dallache que cha a là fait.

In effet l' bâtimint qu'i-est là à côté i-a été inondé dins les cafes à n'ein point qu' les locataires de ç't'immeupe i-eont dû aller vir ailleurs pou s' loger. Cha n'a pos dû ête gai pou ces gins mais infin qu'i soite. L' pus imbêtant ch'est qu'on éteot in train d'orpaver ceulle plache orprise dins l' patrimeoine mondial. Et bé à causse de ceulle ineondatieon, eh bin pou l'interprisse qui s'occupe de ç'n'ouvrache, ch'est dév'nu la Galère.

Pourtant tous les gins qui seont concernés pa ç' problème i z'eont fait des réunieons bin seûr pou n' pos trouver d' solutieon et là ch'est assez normal pasque si cha l'ireot tout seu bé cha n' s'reot pos normal. Infin i va folleoir s'armer d'patieinche pou que l' parvis d' no belle cathédrale i soiche infin fini pou qu' les tourisses qui vienn'tent printe des rinsein'mints au Bureau du tourisme i n' se feont pos ein croque à leus gambes in approuvant d'y rintrer.

Hureus'mint la Justice va s'in mêler, mais là avec i feaut l' temps et les prévisieons les pus optimisses ch'est qu' cha pourreot (pétête) s'arringer vers janvier 2015 .

Et bé milliard ! Pavache, dallache on attind pou l'ouvrache. Mo dieu queu galère !

Du beos d'chuque