non publié - juillet 2014 par Anar

J' refuseos d' vir la vérité in face, mais l'eaut' jour, (cha fait d'jà ein' pair' de s'maines) j'aveos dû queurir chinquante mètes et j'ai compris que j' deveos m' faire ein' raiseon : j' présinte des signes estérieurs de vieillesse. J' sus d'su l' courbe déquindante. Pasque j' sus d'ein poids nett'mint supérieur à l' moyenne, em' méd'cin m'a dit que j' deveos aller vir ein' diététicienne et que j' deveos consulter ein cardioloque et ch'est ç' que j'ai fait.

J'ai d'jà dû aller dins deux indreots du chwapi pou printe rindez-vous, et ch'est dins ein eaute indreot du chwapi que j' vas passer m' visite, mais d'ichi là, j'ai largemint l' temps d'aller in vacances.

Chez l' diététicienne, j'ai orchu plein d' consels que j' vas avoir bin du mau à suife pou minger et surtout pou boire. L' problème, ch'est qu'ell' n'est pos acor comm' not' Maggy, mais pos leon, alors, je m' déméfie.

Je n' sus certain'mint pos ein curé mais j'ai ein' teonsure qui ganne du terrain ein p'tit queop au queop. Em' coiffeu m'a présinté ein tas d' produits miraques pour arringer cha. L'problème ch'est qu'li-même i n'a pus ein poil d'su cailléau, alors, je m' déméfie.

J' viens d'orchevoir ein' lette du chwapi qui dit que m' cardioloque est in indisponibilité et que j' deveos in queusir ein eaute, mais in fait, j'ai appris que li-même aveot eu ein infractus, alors je m' déméfie. I feaut toudis s'déméfier.

T'nez, ravisez non diap's rouches, queont' l'Algérie au début i n'se seont pos déméfiés et berdaf, acor ein queop i passeot'tent à l' trappe.

I feaut toudis s' déméfier. Allez, à la prochaine.

Anar