23 juillet 2014 par Catoupi

Bé mes gins, l'artique i n' s'ra pos leong, savez... Bé tins on est tertous in vacances, adeon ch'est pos facile de s' mette à écrire par ceulle caleur, quand ç' qu'on s' lièfe à dix heures du matin. L' temps d' lire el' gazette, avé les class'mints du tour de France que cha n'in finit pos, i-est d'jà l'heure de l'apéreo et puis du barbecue. Après eine sieste, on décrueaute eine milette et puis on a bin mérité d' passer à l'apéreo du soir. Comme i fait beon, on attind déhors qu'i-a d'z'étoiles filantes et puis on va à s' lite.

N'impêche, on s'ra bin contints qu' Tournai les Bains i comminche, pou canger d' rythme. On pourra faire el' même qu'à l' maseon, mais ailleurs. J' rigole, mais ch'est eine chouate initiatife, pour tertous mais surtout pou les gins qui n'eont pos l'occasieon d'aller in vacances. On peut aller à la mer... à Tournai les Bains ! J' conneos d'z'infants qui seont bin contints d'aller jeuer dins l' sable à côté du Peont des Treos !

I-a bin eine paire de riverains qui trouèftent qu' cha fait du bruit, mais l'z'organisateurs i veont tout faire pou limiter les nuisances. Et d' toute faceon, i n'a pos eine festivité qui n' dérinche perseonne. Imaginez les gins qui z'habitent à l' Grand Plache au Carnaval ou à Obigies au quinze août par eximpe.

Parlant d'Obigies, ch'est aussi eine fiête dusqu'i d'a pour tous les goûts, allez vir el' programme, vous trouv'rez seûr'mint eine séquoi qui vous plaira.

Adeon profitez bin des activités pindant les vacances, tout comme mi !

Catoupi