9 juillet 2014 par Arnitoile

Alfeos les gins qui d'meurent au villache, i dittent qu'i-a bramint d' bruits in ville, mais mi j' trouèfe qu'i-a alfeos des bieaux bruits in ville. Quand ç' que j'éteos rot'leot, j' demeureos au chintre ville, pos louin de l' Grand'Plache, et à l'époque au bieau temps, i-aveot des concerts de carilleon tous les saim'dis à onze heures et d'mi à partir du meos d'avril; jusse pour l'heure de l'apéreo. Et alfeos aussi les jours de fiête. Ch'éteot bin agréape d'ête dins l' cour, sous ein rayeon d' solèl, et d'intinte les cloques de no bieffreo !

Tins j' m'in lasse jamais ! Même quand l' bieffreo i seonne tous les quarts d'heures tous les bieaux airs des cancheonnes tournaisiennes.

Je m' raminvre que quand Roger Delcroix i-éteot dev'nu éch'fin du tourisme, i-aveot mis sur pied des concerts de carilleon du diminche et du lundi d' Pâques ; i-aveot plusieurs concerts tout au leong de l' journée. Cha a duré des ainnées mais i-a follu arrêter quand ç' qu'on a qu'minché les travaux d' restauratieon du bieffreo, et après l' traditieon elle s'a perdue, hélas.

Ch'éteot l' même avec el' Bancloque ; ceulle greosse cloque du bieffreo, elle sonneot chaque jour qu'i-aveot fiête. Pour les évén'mints estraordinaires, comme eine visite royale ou princière ou ein évén'mint particulier, mais aussi à des moumints bin fixés dins la vie tournaisienne. Tins in sétimpe du saim'di à midi pour l'ouverture de l' kermesse, et pétète même à chaque saim'di de l' kermesse, pou l' processieon avec, et du lind'main à huit heures –sifét, sifét – pou l'ouverture de l' brad'rie. In novimpe, ch'éteot le onze, à l'occasion du défilé au monumint aux morts, puis à l' fin du meos, au moumint que l' musique des Pompiers elle ormonteot l' rue Saint-Martin pou l' réceptieon d' Sainte-Cécile à l'hôtel de ville. Et l' même à l' Sainte-Barpe après l' messe à Saint-Quentin quand nos chers Pompiers i défileottent in ville.

Quant on intindeot sonner l' Bancloque, on saveot qu' ch'éteot fiête in ville. Pindant l' prumière partie d' l'ainnée, ch'éteot pou l' kermesse de mai ; L' huit mai sans doute avec à l'époque où on fiêteot acore la fin de la guerre 40-45 ; puis pou l' wékène des Quate Cortèches à midi vingt, après l' parate de musiques militaires, quand ç' que les Chevaliers d' la Tour i z'alleotent à l'hôtel de ville.

Avé les travaux du bieffreo, on a aussi arrêté d' faire sonner l' Bancloque et asteur i n'a pus perseonne à la Ville qui-a l'air de savoir quand ç' qu'i faut la faire sonner ; ch'est bin dammache, foi d' Tournaisien !

Et ch'est l' même avé Marie-Pontoisse ; elle neon pus elle ne seonne pus pou les grandes fiêtes de l' cathédrale, et cha depuis l' tornate ; mi cha m' rind malate. Alors j'attinds impatiemmint la fin des travaux du transept, deux mille dix siept alfeos, pou pouvoir réintinte Marie-Pontoisse...

Infin hureus'mint qu'i-a à nouvieau des concerts de carilleon au bieffreo ; et puis feaut dire aussi qu'on a de l' sanche d'avoir ein deuxième carilleon à Tournai, à l'églisse Saint-Brice, qui seonne aussi des jolies mélodies tout au long de l' journée.

Bé mes gins, si vous habitez la ville comme mi, j' sus certain qu' vous êtes fin bénaisse à chaque queop qu' vous intindez ces si jolis « bruits » qu' nos cloques i feont !

Arnitoile