27 août 2014 par El Soyeu du bas de l'cinse

Banjour, bansoir les gins,

Eh bé l'ovlà, les vacanc's scolaires, i-seont presque outes et dins eine paire de jours, les infants i-orprindreont l' quémin d' l'école.

I d'a qu' cha s'ra l' prumière feos, l' ceull' d' l'écol' des p'tits quious, pou d'z'éaut's cha s'ra pour rintrer à l' grante école.

I d'a qu' cha leu f'ra seûr'mint plaisi, d'z'éaut's neon, mais ein' queoss' qui-est certain, ch'est qu' pou beauqueop d' parints, i f'reont puteôt partie de l' prumièr' catégorie et qu'i pins'reont seûr'mint : «Nous ov'là tranquill' jusqu'au Toussaint».

Hureus'mint, ceull' ainnée, i-a fait à mitan bieau et à mitan quéaud et tertous i-a été pus souvint déhors que d'dins, surtout au meos d'juliet pasqu'au meos d'ahoût, i-a pleu comme vaque qui pisse. Je m' rapinse que quanç'que j'éteos p'tit garcheon, m' mopère, i m'interdiseot, et aussi à m' frère et à m' sœur, d' rester dins l' maseon quanç'qu'i f'seot bieau. Sitôt qu'on éteot l'vés et qu'on aveot mingé ein' tartine avé du beon bure et de l' castonate ou de l' confitur' «faite avec amour» comme elle diseot m' mamère, on alleot jeuer déhors, on rintreot pour deîner et on éteot orpartis jusqu'au soir. On s' laveot, on soupeot et on alleot à s' lit et j' vous promets qu'on dormeot bin jusqu'au lind'main. Asteur, ch'est aut' queosse, i-z'eont tertous des PC, des consol's de jeux que mi je n' comprinds rien du tout. Même que l' rot'leot de m' file, qui va béteot avoir dix ans, l'aut' jour, i m'a dit : «Mais infin, papou, ch'est tout d' mêm' pos compliqué, mais qu' t'es biête...». J'areos dit cha à m' grand-père à s'n'âche, j'areos pouvu m'inqueurir jusqu'au d'bout du gardin, sinan j'in areos attrapé eine. Mais infin, d'aut's temps, d'aut's mœurs.

Pou parler d'aut' queosse, j' deos vous dire que tous les compagneons du Cabaret i z-eont d' l'ouvrache à lir' les cancheonn's, les monoloques et les poèm's ed' tous les candidats au Concours Adolphe Prayez. Et après cha, i s'reont orpartis avé les répétitieons d' l'Orvue 2014. i s'reont pos souvint à leu maseon. Mais infin, ch'est pour el beonne causse.

Avant cha, i n' feaut pos oblier la Fiête de l'Cancheonn' Wallonne el 21 de settimpe au Saleon d'la Reine. Av'nez-y nombreux, cha leu f'ra plaisi.

Su ceull' beonne parole, banjour, bansoir les gins! Et à bintôt pour eine nouvelle bafoule.

El Soyeu du bas de l'cinse