10 septembre 2014 par Tignace

Banjour mes gins, j'espère que vous avez passé des beonnes vacances malgré l' météo. Mi j'ai resté à l'heompe d' nos cheonq clothiers et comme on n'aveot pos vraimint l' temps d' passer nos soirées à l' cour, bin on orwettiot l' télévisieon. A part queulques choittes ordiffusieons, on n' peut pos dire qu'i-aveot grand queosse.

Hureuss'mint, l' soir après l' journal, j'aveos quand même mes cheonq minutes de plaisi in ravisant « Scènes de Ménache », j' rieos plein m' vinte avé Huguette et Raymond. Ces deux-là, toudis à l' tiête de l'ein l'éaute, cha m' faiseot pinser justemint à Gertrute et mi ! Alors, in imitant l' Raymond, j' me sus ortourné vers em' tourterelle et j' li ai dit ainsin : « Hein m' chérie, à part el' tiête des acteurs, on croireot s' vir à l'télé ! ». Et berdaf, j' n'aveos pourtant pos dit eine séquoi d' drôle, j'aveos d'ortour, eine feos d' puque, l'imache et pus l' seon ! (De m' Gertrute, pos de l' télé)

Du lind'main, ses is éteottent acor comme des glaches que m' café i s'a orfroidi d'ein queop !

« Beon » que j' li ai dit, « Vu qu' ch'est comme cha, j' m'in vas printe l'air d'ailleurs ! ». M' seul orgret ch'teot pou m' tchien car ch'teot jusse au moumint de s' petit tour et qu'i s'a ortrouvé s' truffe dins l' porte quand j' l'ai claquée d' rache in sortant. Du queop, j'ai été boire eine paire de pintes par chi par là, j' n'ai pos vu l'temps passer, tertout i-éteot souriant, on s' raqueonteot des bleusses in ormettant eine tournée d' puque. Milliard, queu preone pou mi rintrer mais j'éteos bénaisse et seurtout blindé ! J' pouveos affreonter Malvira et ç' queop-chi, j' faiseos bin attinteon d' rintrer avant l' couvre-feu, histoire de n' pus m' ramasser l' vol du peot d' nuit d' l'éaute jour.

Et d'puis, ch't'ainsin tous les jours que j' m'in vas faire em' pétit tour mais après l' ceu de m' tchien. L' semaine passée, alors que j'éteos à l' terrasse, intre deux draches, du côté de l' rue Royale, v'là ti pos que j' veyeos m'comarate Mimile , bin vite j'ai berlé après pour li in payer eine. Ch'est toudis fiête quand on s'ortroueffe nous éautes deux. C' jour-là, i n'aveot pos l'air dins s'n'assiette, alors j' li ai d'mindé ç' qui n'alleot pos. I-aveot l'air imbété comme eine glaine qui-areot perdu ein oué. I m'a dit qu'i-aveot aperchu, et cha d'puis eine paire de jours, l' manèche de m' Gertrute in train d' faire, toudis à les mêmes z'heures, l' tour des capelles de l' grand-plache.

« Ch'est pasque t'es m'n'amisse que j' t'in parle mais cha fait tout drôle d' vir et' feimme ainsin alors qu'elle a toudis été eximplaire ! » qu'i m' fait.

J' l'orwettieos d'ein ouél et j' li est répeondu : « Adéon, t'in fais pos pour cha, cha li pass'ra !

- Ouais mais te t'in rinds pos compte, avé s' casaque su l' deos et s' foulard su s' tiête, on direot tout eine loqu'teusse qui va à l' tutte !

- Cha li fait du bin !

- Et cha n' te tracasse pos pus qu' cha ?

- Bé neon neon, du cantraire, cha m'amusse !

- Cha t'amusse d' savoir qu'elle beot in f'sant l' tour des capelles pa d'vant tertous ?

- Bé elle ne beot pos, si elle in fait l' tour, ch'est qu'elle cache après mi tins ! »

Allez mes gins, santé et à l' feos qui vient.

Tignace