17 septembre 2014 par Catoupi

Diminche qui vient, el' vingt-et-ein d' settimpe, les cancheonniers du Cabaret i vous invitent à v'nir fiêter avec eusses "l' fiête de la chanson wallonne".

Cha comminche à nouèf heures du matin au Pichou Saint-Piat, avec ein hommache au pied de l' fontaine, et puis à dix heures ch'est à l'Hôtel de Ville.

Là, i-ara comme à l'habitute ein discours du présidint du Cabaret. Mais ç' queop-chi, cha s'ra l' prumier du prési Christian Bridoux, vu qu'i n'a pos cor ein an qu'i-est présidint.

Après cha i-ara l'ormisse des prix du Concours Prayez. Avec ein prumier prix ç't'ainnée pour mossieu Gérard Platevoet, qui-aveot d'jà participé i-a ein an.

Et puis eine séance de cabaret, ein p'tit peo espéciale pour ein queop : cha s'ra eine séance d'hommache à eine paire d'inciens disparus : Anselme Dachy, Jean Leclercq et Lucien Feron qui seont partis pou toudis i-a vingt ans, Albert Coens et Richard Leclaire i-a trinte ans, et Louis Urbain qui-areot eu chint ans ç't'ainnée.

Cha f'ra ein programme fort bin varié, avec comme toudis du rire et aussi d' l'émotieon. Et après cha on ara bin mérité l' verre de l'amitié.

Adeon, orjoignez-nous diminche à dix heures à l'Hôtel de Ville !

Catoupi