1° octobre 2014 par Pichoulit

Eine feos n'est pos coutume, j' vas ichi écrire ein artique qui s'ra eine milette décousu mais i-a tell'mint d'affaires qui m' pass'tent pau m' tiête et qu' je n' comprinds pos que j'vas quand même vous les dire ichi.

Ainsin :

Pourquoi que l'présidint des Français i s'déleomme Hollande et pos France... et in puque j' sus seur qu'i n' sait pos parler flamind ou hollandais. I n' viendreot pos à l'idée de l' reine d'Ingleterre d' s'app'ler Italie.

Pourquoi que s'n'ex feimme (à Hollante pos à l' reine d'Ingleterre bin seur) elle s'appelle Royal alors qu'elle est minisse dins eine république...

Pourquoi que l' présidint de l' communauté flaminte i-a ein neom francopheone alors qu'i n' sait pos nous sintir. Bourgeois qu'i s'appelle, pourqueo qu' ch'est pos Boeren par eximpe ?

Pourqueo i d'a ein de l'NVA qui s'appelle Jambon et qui n'habite pos in Ardennes ?

Tout cha, cha m' carmousse.

Eaute queosse :

Pourqueo in fotbal, l' supercoupe des Français inter l'PSG et Guingamp elle deot aller s' jeuer in Chine. Nous eautes Anderlecht-Lokeren i s'a jeué à Bruxelles et pos à Tokyo quand même ! A ç' queompte-là, on pourreot jeuer l' derby Tournai FC- géants Athois à l' côte d'azur (cha caireot bin pasqu'i parait qu' le FC i n' va pus pouvoir jeuer au state Luc Varenne)

In parlant d'fotbal, pourqueo in été quand tertous i n' met pus d' cauchettes, on n'a rien trouvé d' mieux d'aller mette des cauchettes à les rétros des auteos ?

Tout cha, cha m' carmousse.

Pourqueo on dit qu'i feaut faire d'z'écolomies et qu'on a lommé deux minisses présidints dins l'partie francopheone du pays (à moinsse qu'i n'areottent chaquein qu'ein d'mi salaire...mais cha m'étonn'reot). Pourqueo i-a des minisses in communauté françaisse qui feont partie d' deux gouvernemints (j'espère qu'i n'eont pos deux salaires...i faudreot s'éteonner de rien).

Pourqueo on dit qu'i feaut faire des simplificatieons administratifes et qu' pour compliquer l'z'affaires i-a deux minisses qui veont s'in occuper ? Pourqueo dins ein p'tit pays comme l' Belgique, on a trouvé moyen d'avoir cheonq gouvernemints différints et avec chaque queop eine banse de minisses, cha fait quand même eine cinquantaine in tout....

Pourqueo dins les grantes villes, i-a d'z'éch'fins qui-eont abandonné leu prumier métier pou s' consacrer à leu bouleot d'éch'fin et qu'i d'a d'z'eautes qui continut'tent à faire les deux métiers... ?

Tout cha, cha m' carmousse.

Pourqueo, pourqueo ... mais j'arrête ichi. I-areot acore bin d'z'étonn'mints à dire ichi pourtant. Tout cha, cha m' carmousse mais ch'est pétête pasque l' solel i-a tapé treop fort...

Pichoulit