15 octobre 2014 par Catoupi

Si vous ne l' savez pos acor, ch'est l' titre de l'prochaine Orvue du Cabaret Walleon. Ahais, ç't'ainnée-chi, i veont vous imm'ner au cirque. Cha risque fort d'ête dreôle, vous n' pinsez pos ?

Hasard qu'i-ara seûr'mint des clowns (feaut dir' qu'au Cabaret, cha n' manque pos), trapézisses, jongleus, et tout cha. Pétête avec, des animaux sauvaches (ours, lieons, tigresses, ...) et des luméreos estraordinaires qu'on n' peut pos tout vous dire asteur. Sineon, vous n'arez pus d' surprisses quand ç' que vous irez vir cha.

Bin seûr, Mossieu Loyal et l' directeur i veont seûr'mint gratter à leus ch'feux pour que tout i s' passe bin avé les albrans qu'i d'vreont m'ner à l' baguette.

Et pétête qu'i-ara des visites surprisses de gins importants et d' politiciens. Feaut dir' qu'in politique, i-a alfeos des clowns avec, et ch'est alfeos ein fameux cirque !

Tout cha avé bramint d' cancheons pour bin animer l' scène. Et aussi d'z'allusieons à l'actualité d' l'ainnée, ch'est l' principe d'eine Orvue.

Infin, tout cha i va s' passer saim'di 25 à 20 h (ch'est l' prumière), diminche 26 à 16h, verdi 31 à 20h, saim'di 1er novimpe à 20h et diminche 2 novimpe à 16h (cha s'ra l' dernière).

I-est canseillé d' réserver vos plaches à l'avanche. Ainsin, saimdi 18 inter 10h et 12h, vous pouvez aller querre des plaches à l' maseon de l' culture. I-ara là des gins du Cabaret pou vinte des intrées. On rappelle que si vous avez payé vo cotisatieon avant l' meos d' juin, vous avez dreot à deux plaches gratuites. Aussineon, ch'est quinze euros pour eine plache.

Adeon, pos d'hésitatieon ! Et à béteôt pour eine soirée ou eine après-deîner dins la joie et l' beonne humeur.

Catoupi